السلام عليكم ورحمة الله وبركاته
||~ فخاطري شي .. وحابه أفرغه .. وأسمع رايكم .. أو تبرير البعض للي استوى !!! ~||
الزمان : الخميس 27-11-2008
الساعة : 11:30 إلى 12:30
المكان : كلية طب الأسنان وبالتحديد 015
الحضور : بعض طلبة دفعة السنة الأولى !!
الحدث :
( بتكلم بالعامية .. أسههل فالتفريغ خخخ )
استضافة الدكتورة Pamela Jane Gilbart
من جامعة ملبورن في استراليا
Melbourne Dental School
لإلقاء محاضرة عن FORM AND FUNCTION IN THE DENTITION
~ والمحاضرة من ضمن المنهج .. وشي داخل فالامتحان النهائي
يعني مب شي زيادة واللي حاب يحضر يحضر !!
.
.
اللي صار ورفع ضغطي ..
أول شي الحضور قليل !!
( والدكتورة أثناء حديثها مع دكتورتنا .. في وقت انتظار وصول الطلبة كانت تقول ..
إنها يوم تقدم محاضرة فالجامعة اللي هي تدرس فيها .. تكون الأماكن ملياانة .. وهي مستغربة من العدد !! .. وطبعاً هالفشيلة تكررت على أصعدة عديدة غير الأشيا العلمية )
والمحاضرة دكتورة معروفة وممكن تتعرفون على سيرتها من هالرابط
http://www.dent.unimelb.edu.au/dsweb...s/craig_p.html
لكن .. اللي ما يعرف الصقر .. يشويه !!
والصقر هذا انشوى واايد !!
أنا متأكدة أنه لو بس .. قالوا في ( أتندنس ) . جان العدد تضاعف على الأقل ..
لأنه الطلبة تحولوا من طلاب علم إلى .. طلاب ( أتندنس ) ..
.
.
واقدر احط مبرر واحد لعدم الحضور
وهو أنه آخر يوم (تقريباً ) والطلبة متهاونين فالمحاضرات !!
>> عذر اقبح من ذنب !! <<
.
.
طبعا تعرفون كيف الأجانب ناس ملتزمين فالوقت .. بعكسنا طبعا!!
فوصلت الدكتورة .. والقاعة فاضية الا من رحم ربي ..
وبعد فترة بدوا الناس ايوون ..
وفي ناس دخلوا عقب لما بدت الدكتورة ترمس وتشرح .. يعني متأخرين 1\4 ساعة !!
وداخلين وهم يسولفون ؟!
>> سؤال .. ليش يايين !!
.
.
وهذا غير اللي كانوا .. ياكلون لبان .. واللي يسولفون فالقاعة ..
واللي ردوا على تيلفوناتهم !!!
واللي مشغلين شي فالتيلفون وبصوت !!
واللي مطلعين أوراق ويلعبون !!
واللي ..
واللي ..
هذي أشيا ما تستوي فالمحاضرات العادية !!
أرد أكرر صدقوني ما تستوي .. عشان ما تكمل الإشاعات اللي طالعه عن طلبة طب الأسنان .. صح في البعض يسوونها وهييل موجودين فكل الكليات .. لكن انها تكون بهالكثافة وفمحاضرة وحده !!
عمرها ماصارت !!
تقومون تسوونها جدام ضيفة !!
وحده يايه من برا .. ومتعنية ويايه مقدمتلكم شي !!
( لأنه اللي سمعناه من دكتورتنا أنها هي .. اللي حبت تقدم لطلبة السنة الأولى شي )
.
.
وأنا متأكدة أنه كل هالكلام وصل لطلبتها هناك .. يعني سمعة متميزة عبر البحار ..
نقلتوها
1 >> عن جامعتنا
2 >> عن كليتنا
3 >> عن العرب والمسلمين ومدى اهتمامهم بالعلم
4 >> عن المواطنين !! .. لانه كثار من اللي كانوا حاضرين كانوا مواطنين .. للأسف
( الوطنية .. مب شي نتغنى فيه .. ولا شعار نرفعه .. الوطنية بسلوكيتنا .. =( .. وهذوه حفل اليوم الوطني ما مضى عليه كثير .. ولاحظنا كيف انكم تحبون وطنكم ( بشكلكم ) !! .. ليش ما تكون سلوكياتكم تعكس هالحب !! )
.
.
وشي زيادة بعد أضيفه ..
حركة الطلعة من المحاضرة ..
هذي عاد تستوي حتى فالمحاضرات العادية ..
جي فنص المحاضرة شلوا أشياءهم وطلعوا ..
" أدري أنها تستوي والواحد ممكن يضطر يطلع .. لكن تكراارها ما يدل على أنها للضرورة "
مجرد ملل ..
.
.
هذي حتى استوت ..
وأنا فاعتقادي .. المفروض ..
احتراماً لهالإنسان اللي يرمس جدامي ..
وكونه شخص يديد علي ..
المفروض أني ما اطلع .. ولو طلعت استأذن ..
" وإن كان تبرير البعض في عدم الاستئذان .. هو انهم ما يبون يقاطعون المحاضر "
.
.
أدري طولت عليكم وايد
لكن ..
كل اللي حابه أفهمه .. ليش هالشي استوى !!
وكيف ترضون انه تنقل عنكم صورة مشوهه مثل هذي !!
ليش تبون تثبتون أنه العرب ناس ما يهمهم العلم أبد !!
.
.
يعني مب كافنكم الصورة المشوهه الإرهابية اللي وصلها الإعلام عنا !!
بعد تبون تزيدون الموضوع !!
.
.
ممكن البعض يقول أني مكبرة الموضوع .. وأنه ما يستحق كل هالضجة ..
لكني أعتقده .. يستحق ..
وأنا مستعدة لتقبل جميع الآراء ..
.
.
|| ~ ملاحظة : أنا ما أعمم .. لكن البعض في هذا الحدث .. غلب على البعض الآخرين !! ~||
~ وشكرا لكم على المتابعة حتى النهاية ..
~ طفـــــلة =)
ليست هناك تعليقات:
إرسال تعليق